الشعب.. يريد.. تغيير المسيح

يسوع….
ممكن أكلمك بصراحة شوية علي اللي شفته جوانا ؟
وبصراحة, أنا مكسوف أتكلم…
لا….لا, ما تفهمنيش غلط, مكسوف دي مش بتاعة كل مرة والتوبة وأنا وحش والكلام دة
لا, أنا مش مكسوف من اللي جوانا…أنا بصراحة….مكسوف لك ….إنت!

أصلي الفترة اللي فاتت قعدت أفكر في كم المشاكل اللي إنت عاملها لنا في البلد, إنت أكيد عارف, مضطهدين جامد بسببك, وشكل اللي جاي علينا اسود من اللي فات, وكمان بينا وبين بعض منقسمين ومتحزبين وبنقطع بعض.

ولما ركزت, لقيت إن المشكلة عندك إنت, مش عندنا, تصدق؟
أنا إمبارح الفكرة جت في دماغي, ولقيت الامور بتركب علي بعض كويس قوي, وكل حاجة بتتحل, بصراحة أنا عمري ما فكرت كدة, بس معلش إحنا في زمن الثورات بقي, وممكن الدور يجي علي أي حد, حتي إنت.

وأعتقد إنه جه الوقت اللي إنت محتاج تاخد بالك من المشكلة الكبيرة اللي إكتشفناها, وأنا جاي بالنيابة عن الثوار أتكلم فيها.

بص يا يسوع, إنت شخص رائع, مش مختلفين علي كدة, بس المشكلة ببساطة, إنك عاوز تخرج برة الكنيسة, ومش واخد بالك إن الموضوع دة ما ينفعش خالص خالص, إنت مكانك في الكنيسة وبس, وإحنا ينفع نيجي نزورك كل شوية, بس لازم تفهم إنه إنت ما ينفعش تخرج منها. وبجد مشكلتك إنك مش واخد بالك من الموضوع دة اطلاقا, ومصمم تروح معانا كل حتة.

طيب, إنت تعرف في كام واحد أما أخدك معاه الشغل حصله مشاكل وخساير بالهبل؟ طبعا عارف, ما كلها كانت بسببك, أنا شخصيا, ما اعرفش حد أخذك معاه الشغل وما حصلوش مشاكل, يبقي بزمتك المشكلة فينا, ولا فيك؟

دا أنا حتي في واحد صاحبي مع الوقت قرر يسيبك في العربية لغاية أما يخلص شغل, بعدين لقاك حتي وهو بيسوق عامله مشاكل, وإنت مش قادر تستوعب مشاكل السواقة في مصر, ومع الوقت قرر يسيبك في البيت, وشوية راح مرجعك الكنيسة.

هاديك مثال تاني, إمبارح كثير راحوا يصوتوا علي تعديل الدستور من غيرك, وأما كلمناهم عليك, بلسانهم قالوا “أه طبعا” الخداعة, لكن بقلوبهم قالولنا بلاش دروشة وسلبية, خلي يسوع محبوس في الكنيسة لأنه لو طلع معانا الشارع بعدها يمكن يتوه, عشان هو مش عارف حاجة فى دنيتنا ديه,خليه فى الجلجثة المكان اللى هو يعرفه وإحنا نبقى نروحله هناك واحنا فاضيين, ويمكن لو طلع معايا الشارع يورطنى توريطة سوده فى موضوع محتاج التصرف بحكمة.

شفت قالوا إيه؟ شفت سمعتك بقت عاملة إزاي؟
بصراحة, أنا ما عرفتش ارد, ما عرفتش أدافع عنك, حاولت اراضيهم وأمسك العصاية من النص علي قد ما قدرت, حاولت أقولهم ياخدوك معاهم وإنت مش هاتتكلم, لكن ما فيش فايدة, هما عارفين إنك ما عندكش حكمة وما بتعرفش تسكت.

ما هو أصل إنت اللي مش بتفهم في السياسة, مش لما سألوك, قلت  اعطوا اذا ما لقيصر لقيصر و ما لله لله (لو  20 :  25), هي دي الجملة الوحيدة اللي قلتها علي السياسة, وكشفت لكل الناس إنك مش بتفهم فيها وبتهرب منها, واللي حاولوا يحترموا جملتك اليتيمة دي, جابوا الآية يمين وشمال وقلبوها وعجنوها وخبزوها, وفي الأخر, ما فهموش حاجة, واتخانقوا مع بعض بسبب كلامك الغامض اللي هربت بيه من السؤال.

ومش بس مش بتفهم في السياسة, دا حتي منهج الكنيسة وفكرها ملخبط عندك وغلط, ايوة غلط وألف غلط كمان… ما تستغربش! عايزنا نكون ملطشة وسط العالم؟! مضطهدين وفرحانين اما نتهان  (اع  5 :  41)؟؟ ليه هو إحنا مجانين؟
وقال ما نستغربش اما يولعوا فينا(1بط  4 :  12)؟ ليه؟ المفروض نعيش في رعب بقي؟
عايزنا ملطشة؟ عايزنا ضعفا ومذلولين ومحتقرين ليه يعني؟ بتنتقم مننا؟ نحول الخد الاخر اما ننضرب, ونرفع عينينا علي الله الآب وسط الضيق ونقبل الصليب ونقول إغفر لهم والكلام الفارغ دا؟!
طبيعي وسط الجو المريض اللي عايزنا نعيش فيه, نمسك ايه “لماذا تلطمي”, ونقعد نجيب فيها يمين وشمال ونلويها ونلفها, , يمكن نلاقي مخرج من المهزلة اللي عايزنا نعيشها!!! ونحاول نشوفك منها فارس زي صلاح الدين الايوبي كدة, أو ثائر زي ويليام ولاس بتاع “Brave Heart”, بالمناسبة وبصراحة, الافلام دي احلي من إنجيلك والناس بتستمتع بيها اكتر من فيلم الامك*

صدقني الناس عارفينك كويس, لأنك مش عملي خالص, وكمان مدروش علي الأخر, خيالك واسع وبتسمي دا إيمان, بصراحة ليهم حق, ردودك في الإنجيل غير عملية بالمرة, وسعات مالهاش علاقة بالسؤال, وناس كتير كانت بتتريق علي كلامك الغريب دة, وإنت عارف الدنيا بقت عملية دلوقتي أد ايه؟

إحنا في عصر الإنترنت, فيه ألف خبر في الثانية الواحدة, بزمتك أقراهم ولا اركز معاك؟ دا بالعكس, إنت بتسبب تشتيت
إحنا في عصر فيه فيسبوك بيقلب حكومات دلوقتي, ومصر بتتغير, بزمتك اشارك كلامك ولا الأخبار الجديدة؟
فيه كمان فضائيات وحرية, إختراع كبير, يا ريته كان موجود أيامك كان خلي الناس تشوف الصلب والقيامة علي الهوا يمكن كان الموضوع فرق معاهم اكتر شوية وصدقوك.
إنت مش دريان بكل الكلام دة, لأنك مش هنا, إنت عايش في إنجيلك ومش عارف تطلع منه, عاوزنا نطلعك ليه يا أخي؟

مش بس كدة, دا إحنا حتي لو حبسناك وجبنا بس في سيرتك, برضه جايبلنا المشاكل, كل ما نقول للناس عليك, يهيجوا علينا, ويقلولنا يعني ما نروحش التصويت؟ يعني ما نحبش الوطن؟ يعني ما ننزلش التحرير؟ يعني ما نروحش ماسبيرو؟ يعني نبقي سلبيين؟ كلامك بيطلع كل دفاعاتهم, تخيل سيرتك وكلامك بس بيعملوا مشاكل وخناقات, بصراحة وماتزعلش مني, كلامك رخم اوي يا يسوع, ودمه تقيل كمان ومستحيل يتسمع وإتقالك كدة في وشك ومن تلاميذك (يو  6 :  60), والحل الوحيد أن كلامك  يفضل محبوس في الكنيسة معاك.

مسكين يا يسوع, بصراحة, مش عارفين نشوف غير فاشل كبير, وإنت اللي جبته لنفسك!

عشت غلبان عالة علي شوية ارامل, اللي حبك كان علشان مصالح وإنت عارف (يو  6 :  26), أغلب الناس كانت بتكرهك بجد, ومن قلبها, قالو عليك فيك شياطين, ومفجوع, وسكير, ومحب للزواني (مت  11 :  19), كاسر للشريعة, مجدف(لو  22 :  65), حاولوا يرجموك, ويرموك من علي جبل حصدت سبع محاولات قتل, والتامنة نجحت وصلبوك, ضيعت عمرك علي 12 تلميذ, واحد باعك, والتاني انكرك وسبك ولعنك, والباقي هربوا, اللي عملت معاهم معجزات طلبوا صلبك, وكمان إنت مت موتة عار أوي, وفي عز شبابك. وحتي خدمتك ما شفتلهاش ثمر غير اللي خانك واللي أنكرك, يمكن واحد مصلوب صدقك, بس معلش دا كان بيخلص في الروح.

خلينا نتكلم بصراحة, وبطريقة عملية كدة, ومن فضلك حس بالناس شوية, وخليك صريح وإسأل نفسك سؤال واحد.

هي دي ال “CV” اللي المفروض احطها قدامي وأمشي وراها؟

إوعي تزعل من اللي باقوله, حياتك شرحها أشعياء في اصحاح 53 وقال كلام اصعب من اللي أنا قلته عليك, ولو أنا هالخصها هاقول عليها حياة فاشلة, مين يلزمه الحياة دي؟ طبعا ما حدش, والدليل إن اللي مشيوا وراك بجد, قليلين جدا, ها….صدقت؟

ياعم أنا عندي عيال عايز أربيها, وحياة عايز أعيشها, أنا لسة في عز شبابي خليني اتمتع بالدنيا.

مسكين يا يسوع, لأنك ما عشتش وسطنا, مش دريان بدنيتنا ومشاكلنا وعصرنا, عايش في السماويات وسايبنا هنا ما تعرفش أي حاجة عن حياتنا, إحنا هنا يا حبيبي يومنا عملي وزحمة فوق الوصف, شغل, فلوس, دراسة, جواز, عيال, اجتماعيات, واجبات, ما بنضيعش وقت. إحنا علي الأرض مش في السما. أما نطلع السما نبقي نعيش حياتك.

إزاي عايزنا ناخدك شغل عامل زي الغابة وإنت وديع ومتواضع؟
إزاي عايزنا ننزل بيك شارع بيحكمه البلطجة وقلة الادب, وانت لا يسمع صوتك في الشارع؟
إزاي عايزنا نخليك تربي عيالنا؟ علشان تجننهم لنا بدري وتلخبط حياتهم زي ما لخبطت حياتنا؟
إزاي عايزنا نخليك في علاقتنا الزوجية, يا اخي دي اسرار؟
إزاي مش واخد بالك إنه اللي ما يعرفوكش مرتاحين ومش جواهم الصراعات اللي جوانا؟

يسوع…لو سمحت, كفاية أوي كدة…
من فضلك راجع نفسك كويس, الوضع أصبح لا يحتمل, إحنا قربنا نخسر حياتنا ونخسر بعض بسببك.
إحنا ما يلزمناش الحياة دي خالص, عارفين إنك عشت حياة كلها حرية ونقاء.
بس لو اللي فات دة هو الحرية والنقاء, بصراحة, إحنا عاجبنا العبودية والجزية والنجاسة, يا عم أعيش كلب ولا أموت أسد.

علي فكرة إحنا حاولنا نرضيك ونلبس حياتك علي مقاس حياتنا, يعني نعمل واحد كوكتيل كدة, بس ما نفعش, ما عرفناش, وبصراحة اتخنقت موت, أما لقيتك بتكحلها وبتقول (لا يستطيع أحد أن يخدم سيدين – لو  16 :  13) يعني أنا باحاول اراضيك, وإنت كمان مش عاجبك؟

صحيح… رضينا بالمسيح, والمسيح مارضيش بينا…
بجد, أنا هنا باتكلم بالنيابة عن ناس كتير, إحنا تعبنا أوي, خلاص مش قادرين نستحمل.
مرة أخيرة, راجع نفسك, حاول تغير مبادئك…
وأوعي تزعل من كلامنا, إحنا بجد بنحبك, بس علي طريقتنا…
صدقني إحنا عاوزين ننزلك من علي الصليب…بس زي ما اتفقنا, ما فيش خروج برة الكنيسة…
دي شروطنا…
وإلا هتلاقي قلوبنا بتهتف… الشعب… يريد… تغيير المسيح…

 +++

من لا يعجبة الكلام, وغضب من الإسلوب,وهايمسك حجر ويرجمني, أحب أفكره بكلام ناثان النبي لداود الملك

وبدل ما الناس تغضب عليا أنا
تعالو كلنا نغضب علي نفسنا وعلي قلوبنا النجسة
دي هرطقات قلوبنا ناحية مسيحنا اللي الظروف عريتها وكشفتها, دا إنكارنا لتجسده وإتحاده بينا
دة تجديف نجاساتنا, دي حقيقة رفضنا ليه علي مستوي القلب
دا يومنا اللي بيحاول يهرب منه
دي ثوراتنا المكتومة … ناحية مخلصنا

بلاش كلام كبير وشعارات
دا الكلام اللي جوة نجاسة قلبي أنا شخصيا

 +++

سيدي يسوع.
يا من أحببت كل خليقتك, وتمنيت أن يكون فيهم ذلك الحب (يو 17: 26).
محبوب أنت باللسان والكلام, محتقر ومخزول بالافعال (اش 53 : 3), مهمل ومرفوض بالتصرفات.
طلبت أن نكون هيكل لسكناك (1كو 3 : 16),فرفضنا طلبك, وتركناك تقرع خارجاَ (رؤ 3 : 20).
وتمنيت أن تحيا فينا(يو 17 : 26), فقتلنا أمانيك, وصلبناك داخلنا (عب 6 : 6) .
عشت وحيدا, كل من يقنربون اليك يقتربون لاغراض في انفسهم (يو  6 :  26) .
لم يهتم بشخصك احد (اش 53 : 2), بل إهتموا بوضع في نظريات, ورفضك أنت.
حين أعلنت قبولك للأمم…رفضوك, وقاموا عليك ليرجموك (لو4: 23 – 30).
حين فعلت غير ما اعتادوا عليه, أدانوك وإتهموك بالجنون وباتباع الشياطين وكسر الشريعة(مر  3 :  22).
لم تات لتدين بل لتخلص (يو 3 : 17), مع أنك وحدك المستحق أن تدين وتغلق علي الكل.
وأنا هنا واقف أدين كل من حولي …إلا نفسي.
لم تدن المرأة الخاطئة في خطية واحدة فعلتها (يو8) .
ونحن ندين الأخرين في كل حياتهم, ونحكم عليهم بالهلاك الأبدي وكأننا نفحص الكلي والقلوب.
أتيت برسالة حب. لتبذل نفسك من أجل الفجار ومن أجل أعدائك (مت 20 : 28)/ (رو 5 : 6) .
أتيت كمعلم برسالة من الاب,في حنان علمت وشفيت وصبرت علي كل عناد, فانهاروا أمام سلطان حبك.
ونحن واقفين كمعلمين قساه. نضمر كل عداء وكراهية ووعيد لكل من لا يتبع تعاليمنا.
أحسست بضعفنا ونزلت إلينا من سماك, ونحن نتعالي ونامر الناس أن تصعد لمكاننا, ومكاننا هو الهاوية ولاندري, بل لا نريد أن ندري.
يا من يقبل كل من ياتي اليه ولا يرده, ونحن نرفض الكل, ونتجرأ وندعي ان هذا لحماية الايمان.
يا من أسلم نفسه من أجل الكنيسة, ونحن نتفنن في تمزيقها الي أشلاء, متوهمين أننا نحميها.

نصرخ اليك…
إرحمنا من فسادنا, وانر علينا من ظلمتنا, ارنا وجهك لكي نستفيق من هذا الفخ.
فخ الكبرياء, الذي يعمي كل من يقع فيه, فياخذك ليصلبك وهو لا يري من أنت.
أنر عيونا وأذهاننا يا سيد الكل.
فنري إبنك المطروح تحت أقدامنا, ونري دمه المسفوك بايدينا.
نري جسده وكنيسته الممزقين بسبب كبريائنا.
فنستفيق, ونعطيك كل المجد والكرامة الائقين بك.
ونخضع لك, ونعرف فكرك, ونخدم بروحك.

Romany Joseph
20thMarch 2011
 
 
—————————————————————–
* تم إضافة ذلك الجزء يوم  5 أكنوبر 2011 في وقت تظاهر الاقباط  بسبب حرق الكنيسة

 

Advertisements

About RomanyJoseph

قليلون من يبحثون عن الحق، وقلة منهم جادة وأمينة، وهم فقط من يعبرون صدمة خداع ما لُقن لهم وحفظوه...لينطلقوا في النمو في معرفة الحق... إنها رحلة إكتشاف للموت وعبور للقيامة
This entry was posted in أدب ساخر, الكنيسة and tagged , , . Bookmark the permalink.

34 Responses to الشعب.. يريد.. تغيير المسيح

  1. rimadonna says:

    انا بصراحة اتخضيت في الاول من اول العنوان الغريب لحد اخر حته ، كنت بقول ايه الكلام الغريب ده ، بس فعلا الواحد عمره ما فكر فيها كده، الصور تبدو قاسية اوي و لن يقبل بسهولة حتي علي مستويا الشخصي، بس تخيل اننا فعلا بنعمل كده ،و المشكلة الكبيرة اننا مش حاسيين !!!!!!!!!!!!!!!!!11111111111

  2. sherry awad says:

    amen ya romany, thank u, plz let me share

  3. RomanyJoseph says:

    فكرة المقال مستحواه من قصة الأخوة كارامازوف لدوستويفسكي, ومقولة لصديق عزيز

  4. rimadonna says:

    http://www.4shared.com/get/2yQx8-DS/_–_.html
    ده عشان اللي عارفين الاخوة كارامازوف ، ذي بالضبط :]
    و صديقك ده هو هو صديق ذهبي الفم و لا واحد تاني:]

  5. remon kedeis says:

    الشعب بعيد عن المسيح
    كلامك جوا كل واحد فينا لكن المشكلة الحقيقية هي فينا، دايما عاوزين اللي يخدم اهواءنا وشهواتنا
    وعمرنا ماعشنا الكتاب المقدس او كما يحق لانجيل المسيح،
    كل ما يحدث هو حدث ويحدث وسوف يحدث
    رايناه مع ابراهيم ابو الاباء ولم نعيشه
    رايناه مع شعب بني اسرائيل في عبودية فرعون ولم نعيشه
    رايناه مع في السبي ولم نعيشه
    رايناه في الحروب ولم نعيشه
    رايناه ………………………….وقراناه وشرحناه وتكلمنا عنه ولم نعيش
    والان نعيش ونمتحن لنستحق ان نكون من شعبه
    لاننا تخيلنا (كالعادة) ان السماء من حقنا حتي لو لم نقدم اي شي
    ونسينا اننا لو قدمنا كل شى، ليس لنا حتي ان نكون مستحقين نعمة اننا ندعى باسمه

    لانه ليس فينا قوة ولا نعلم ماذا نفعل لكن نحوك اعيننا
    اعن ضعف ايماننا

  6. ماركو جورج says:

    حلو جدا المقال
    عجبني الاسلوب في التعبير عن الفكرة بوضوح بسيط خالص
    يارب ارحمنا وارشدنا لحياة مسيحية حقيقية

  7. samer says:

    طبعا فضيحة بجلاجل لكل قلب نجس .. وأولهم العبدلله
    ربنا يديك نعمة بجد .. ويحافظ عليك من من حروب ابليس لحد ما تكمل خدمتك

    • RomanyJoseph says:

      شكرا سامر, ونشكر ربنا إن حل القلب النجس عندر ربنا
      ونشكره اكتر إن ادانا نعترف بده, لانه لو مش هانعترف, مش هانتغير
      ربنا يدينا القلب المنسحق اللي مدرك نجاسته, وفي نفس الوقت مدرك لتنقية المسيح لينا

  8. nermine says:

    god bless you
    فعلا الشعب يريد تغير المسيح ونكون مسيح اخر بحسب اهوْانا وشهواتنا بتفكرنى بالايه اللى فى اشعياء النبى وهو بيقول وفى اخر الايام يجمعون لانفسهم معلمين مستحكه مسامعهم و بولس وهو بيقول انى اخاف ان تحولو الى انجيل اخر انا مش فاكره النص بالظبط ولكنه فى رساله كورنتوس التانيه
    ناهيك يا رومانى انا بحب الاسلوب الساخر فى الايام السوداء اللى احنا فيها
    لان الكلام الجد محدش بيسمعوه بل وينتقدوه ايضا

  9. Shady Shokry says:

    انا اتخضيت ، بس مش عارف ليه ؟.. مع اني بفكركده وبشتكيه دايما
    ياربي اديني قلب نضييييف…

  10. Mourad says:

    رومانى الباكى بجد المقال فوق مستوى التعليق انا بجد بعمل كده بس بخاف اقف قدام مراية نفسي
    شكرا للكلام الحقيقى بجد واجب علينا الاعتذار ليسوع

  11. Mero Albert says:

    shokran le sama7 rabna 2ni 22ra 7aga zi kada
    bgd s7 k2ni ketabtk deeeh kanet merayt nfsy 2w balwara le kalam keteer fena
    bs sam7 d3fi lama 2ss2lk 2zai 2sa3d nfsi lama tkon al 2s2la keeteera zi kda feya we 3aiza 2egaba ?
    rabna ybarkeek
    thanks

    • RomanyJoseph says:

      أشكرك عزيزتي
      ودا كمان اللي كان جوايا انا
      أعتقد إن أول خطوة هي الاعتراف بحقيقة حالنا وضضعفنا المستخبي خلف كلام جميل
      دي توبة تعمل تغيير حقيقي وتدريجي في قلوبنا
      المسيح يغرينا دائما دائما لما يلاقي إتجاة قلونا إننا نتغير معاه

      اتمني اكون جاوتبك
      ربنا معاكي

  12. Marina Francis says:

    waga3etni awi

  13. Pingback: بين المنظور والامنظور | Romanyjoseph's Blog

  14. Pingback: حتمية مجئ شاول قبل داود | Romanyjoseph's Blog

  15. hmhhmhhmh95 says:

    على فكره إسلوب سئ جدأ إنك تكتب بيه ….. وحياتنا السيئه مش مبرر عشان تكتب بالإسلوب الزباله ده وبعدين تيجي في حته وتقول اللي إتضايق من كلامي كان أولى إنه يتضايق من أوضاع حياتنا …. أصلاً ممكن حد مايكملش المقاله ويوصل للنقطه السخيفه بتاع لو إنت متضايق من إسلوبي إمسك حجر وإرحمني
    أنا أساساً همسك قالب طوب وأفتح دماغك
    إنت أصلاً ماينفعش تقول ” رضينا بالمسيح والمسيح مارضيش بينا” … تحت أي ظرف ، حتى لو كنت هاتيجي تعتذر بعد كده
    إنت تعبان

    • RomanyJoseph says:

      معلش انا راجل قولت اللي في قلبي ناحية المسيح
      اللي عايز يرجمني يتفضل
      واللي عايز يشتم كمان ما فيش مشكلة
      انا استاهل اكيد
      ربنا يباركك

  16. جاكلين says:

    رجاء رجاء رجاء لاتكتبون بهذه الطريقه الاسلوب غير جميل وغير مهذب المسيح عظيم جدا لايستحق منا ان نتمسخر عليه بهذه الطريقه ومن ثم نعتذر سامحنا يايسوع واغفر لنا

    • RomanyJoseph says:

      هو دا اللي فهمتيه من المثال يا خت جاكلين؟
      عموما….دا اللي في قلبي….
      مش هاجمله…انا قلبي بيقول الكلمات دي للمسيح
      مش هاجملها لأصدق لساني

  17. جاكلين says:

    المسيح اعضم شي في الكون لايجوز ان يتكلم عليه اي شخص به\ه الطريقه

    • RomanyJoseph says:

      هاكرر كلامي زي ما بتكرري كلامك يا أختي العزيزة
      مرة تاني…دا اللي جوايا ودا اللي في قلبي النجس
      صليلي يتغير
      واتمني بلاش تكرار كلام كأنك لا تسمعيني

  18. lalla says:

    موحلو الكلام بحق المسيح لكن انتى حر في كتاباتك

  19. lalla says:

    انتى انسان شجاع لانك تخرج مافي داخلك

  20. the doctor of spirit says:

    لا حياه لمن تنادى

    انت تقول المشكله فى يسوع ! و تقول ان بسببه نتعرض لمشاكل فى الشغل و و و و و
    ماذا تريد ؟؟؟ لا افهمك صراحتا
    اتريد ان نكون كما يريد الناس ان نكون …اى عبث هذا !
    انا شخص احب المسيح و هو يحبنى ….ما دخل الناس بذلك ؟
    الخطأ عند الناس لان الناس لا تقبل الاختلاف و منغلقين على انفسهم و هم على خطأ و ليس نحن و هذه مشكلتهم هم

    و انت بمنتهى السزاجه تتشجعهم على ان يتحكموا فينا بدلا من ان تنادى بالحريه

    اين العقول ؟

    • RomanyJoseph says:

      شكرا لك
      انا احبه باللسان وليس بالحق
      وفقط كتبت ما بداخلي نحوه
      صلي لأجلي كي أحبه مثلك ويظهر ذلك في سلوكي ولا يكون كلمات جوفاء

  21. Pingback: ولم أجد مَنْ أثق فيه.. إلا أنت وحدك.. ومَنْ هم فيك | Romanyjoseph's Blog

  22. Mina Safwat says:

    الله فاحص القلوب والكلي
    لا بهم اذا قلته بلساني مادام في قلبي وما كتبته هو ما في قلبي انا
    انا اصلي كل يوم ب
    إزاي عايزنا ناخدك شغل عامل زي الغابة وإنت وديع ومتواضع؟
    إزاي عايزنا ننزل بيك شارع بيحكمه البلطجة وقلة الادب, وانت لا يسمع صوتك في الشارع؟
    إزاي عايزنا نخليك تربي عيالنا؟ علشان تجننهم لنا بدري وتلخبط حياتهم زي ما لخبطت حياتنا؟
    في النهايه اخي روماني علي ان اختار أعيش كلب ولا أموت أسد علماً بان قد وهب لي كل ما هو للحياه (أسد) و التقوي ولكن الحياه تبان اسهل ككلب
    dear Jesus ,
    life is shit please open my aye to see things from your point of view to try your ways to believe in it. one thing will lead to other .i believe your way is the correct way but not the easy way.
    Jesus bless your life romany, use you more to speak in what in my heart but can’t be said by my tongue

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s